Video

Hajdim Islami/
Vushtriapress

4 Gusht 2008 - Lulzim Fushtica, Drejtor i Qendrës së Kosovës për Siguri Publike, Edukim e Zhvillim (QKSPEZH) nga Vushtrria,së bashku edhe me Alex Rivera, këshilltar, nënkolonel Mentor Shabani, drejtor i Mbështetjes Administrative në Policinë Kufitare dhe major Azem Malaj, komandant regjional në Policinë Kufitare të Kosovës, kanë marrë pjesë javën e kaluar në Konferencën Ballkanike të akademive të sigurisë publike që është mbajtur në Tiranë, ka njoftuar Ministria e Brendshme e Republikës së Kosovës.

Në këtë Konferencë morën pjesë edhe ambasadori i SHBA-ve në Shqipëri, z. John L. Withers, ambasadori Robert Bosch (OSBE), ministri i Punëve të Brendshme të Shqipërisë, z Bujar Nishani, drejtori i Përgjithshëm i Policisë në Republikën e Shqipërisë, Ahmet Prençi dhe pjesëmarrës të tjerë.Konferenca ballkanike e drejtuesve të akademive të trajnimit policor u organizua nga programi ndërkombetar i Departamentit Amerikan të Drejtesisë për asistencë trajnuese në hetimin e krimit (ICITAP) me mbështetje të OSBE-së dhe me ndihmën e policisë së Republikës së Shqipërisë.

Qëllimi i kësaj konference ishte ndërtimi i rrjeteve, shkëmbimi i metodave dhe burimeve të përdorura në trajnimin për zbatimin e ligjit, si dhe rritja e bashkëpunimit mes Shqipërisë, Kosovës, Maqedonisë, Malit të Zi dhe Serbisë.

Në këtë Konferencë u vendos që shtetet fqinje të Ballkanit të vazhdojnë bashkëpunimin në dobi të shteteve ballkanike. Takimi i radhës pritet të mbahet në muajin shtator të këtij viti.