Video

Ftohtësirën e fqinjve ballkanas do ta
shkrijë kultura, arti, humanizmi, mirësia…

“Xhaxhi Rizai, thotë xhaxhi Eqeremi, eja me të shpejtë!”
Është një fëmijë nga të ansamblit tonë folklorik artistik “Shqiponjat” që ka ardhur në tavolinën ku unë po luaj shah me sërbin Slavko Mastikosa, i cili po këmbëngulte të merrte me cdo kusht revanshin e një dite më parë ku ai kishte humbur në sy të gjithëve ndeshjen me mua.
Mastikosa është shofer me shumë përvojë që ka shëtitur ngado me autobuzin e tij nëpër Evropë.

Me ne të dy është edhe sërbi tjetër, Aleksandër Stefanovic. Aleksandri vete dhe ble kohë pas kohe birra dhe na qeras ne, shokun e tij me të cilin ka udhëtuar qënga Bjelina që ndodhet në Republikën sërbe të Bosnjë Hercegovinës dhe mua, shokun e tij të ri.

Që të dy ata, shoferi shahist, një shahist që nuk pranon asnjë mëshirë, që reziston si burrë dhe që pi duhan papushim pa më ofruar as edhe një mua që llafos ndërkohë me të tjerët apo këndoj nën zë, si edhe Aleksandri, një historian i shquar i vëndit të tij, janë miq. Ata për të ardhur në këtë vënd shplodhjeje për fëmijë që quhet Sveti Stefan dhe është në periferinë e qytetit të njohur buzëliqenas, Ohrit.
Po zhvillohet një festival folkloric ndërkombëtar, ku kanë ardhur grupe fëmijësh nga Republika e Maqedonisë ( edhe një grup nga shqiptarët e atjeshëm), nga Kroacia, Slovenia, sllovakia, Sërbia, Bosnje Hercegovina dhe ne , “Shqiponjat” e Kryeqytetit, të Eqerem Tugës, mikut tim pilot, ish instruktor fluturimesh.

Aleksandri është prindi i një valltari rreth 13 vjecar.
“Thuaji xhaxhi Eqeremit, qe, erdha, sa të mbaroj këtë lojë”, i kthej përgjigje cunit pasi kontrolloj nëpër xhepa se mos shoku i dhomës sime, më kërkon celësin.

Një minut më pas, xhami po kërciste. E qëllonte s i i tërbuar Eqeremi.
Lashë birrën pa mbaruar, u them dy shokëve “Hvalla” ( e mbaj mënd këtë fjalë nga ajo turke “Hejvallah”), dhe u jap këmbëve andej.
Ndej të rendin pas meje dy palë hapa.
Para duarve të Eqeremi është një fëmijë i zverdhur dyll dhe që i rrjedh papushim gjak nga krahu.

Ka kaluar ora njëmbëdhjetë e natës tanimë.
“Riza, kam frikë se ka prerë venën keq. I rrjedh gjak. Shumë”.
Duke luajtur , djali i shokut tonë të mrekullueshëm në Tiranë, Hajredinit, ka thyer xhamin e dritares dhe ka therur dorën e njomë me xham.
Hajredini vjen thuajse cdo pasdite të shikojë provat e ansamblit – përforcuar tanimë me përvojën prej superfuqie të Prof. Dr. Ramazan Bogdanit.

Këtë radhë ka ardhur me ne edhe Fatmir Veleshnja, një nga zyrtarët e lartë të kulturës në kryeqytet.
Jemi bërë dyll të verdhë të gjithë.
Gjaku rridhte. Asnjë telefon në këtë pallat fëmijësh dhe asnjë taksi.
“Riza, e kemi ne mjeken me vete”.
Hapat që paskëshin qënë pas meje tani po më flisnin me një zë që më shkriu gjakun.

Ishte historiani Aleksandër.
Si na kapi nga krahu miqësisht mua dhe Eqeremin u vërvit si era shkallëve përpjetë dhe, tha brënda një minuti, te ne erdh mjekja e ansamblit “SKUP Semberija”, zonja Bosa Stonajlovic.
Mjekja sërbe hapi arkën e madhe plot me paime mjekësore e ilace dhe nisi të mjekonte fëmijën.

Eqeremit nuk i lëvizte asnje nerv i fytyrës.( Ai nuk do të mundëte të flinte pastaj tër natën . Që të dy me të shoqen zemërbardhë; Letën, kujdesen për fëmijët e ansamblit si t’i kenë fëmjët e tyre)

…Nuk më hiqet nga mëndja një vajzë vetëm 7 vjece, që villte në makinë , e mbante celofanin në dorë dhe derdhte lotë pa zë. Lotë të mëdhej sa njëra nga faqet e vogla të Xhesikës. Leta , në kthim, e mbante në prehër, e krehte, i vinte në flokë karfica nga të sajat dhe i tregonte përralla që të mos e zinte më makina sikundër kur u nisë
Dhe atë nuk e zuri më.

…Më së fundi, mjekja psherëtiu e lehtësuar.
Ende nuk i qe larguar e zbehta e fytyrës as asaj.
Aleksandri, përktheu:
“Hemoragjia iu ndalua dhe kjo ka shumë rëndësi. Mirëpo, doktoresha këmbëngul që djalin duhet ta dërgojmë edhe në spital. Ka nevojë për një… “

Me se ta dërgonim? Dhe…Ku të pyesnim për spitalin?
“Ju nis unë me veturën time”, dëgjova një anglishte të ngadaltë nga pas.
Ishte Marian Sajkovski, menaxheri i ndërtesës, një djalë i shëndoshë, maqedonas.

“ Kenke king”, i tha në shqip Dr.Prof. Ramazan Bogdani Marianit që u nis me veturën plot drejt spitalit.
(Në mëngje Marian më pyeti se cfar donte të thoshte fjala “King” , mos donte të thoshte “Car”?. Ohohooooooooo, Hvallaaaaa)

“Aleksandër. Unë jam i zënë deri në fyt me librin “Piloti i katër presidentëve”. Kisha vendosur të mos shkruaja asgjë për festivalin , se kam humbur katër ditë shumë të cmuara këtu.. Nuk kam kohë, por, do ta gjej kohën me menjëherë sa t ë kthej në Tiranë, e do të shkruaj për këtë ngjarje”.

Kështu iu drejtova shokut tim sërb tanimë, i cili kishte tundur kokën me dhëmbje atëherë kur unë, për t’i spieguar njërën nga psikollogjitë egzistuese në disa shqiptarë për popullin sërb, i kisha cituar një poezi të antinazistit të përbetuar Berthold Breht
Poezia thotë afërsisht kështu:
“ Askush nuk vejn në banesën tonë
thonë se ne jemi gjermënë, pra
kriminelë
Askush nuk shkëmben një fjalë me ne
thonë se jemi gjermanë
dhe flasim një gjuhë kriminelësh
Me vajzën time nuk vjen të lozë asnjë fëmijë
Ata thonë se vajza ime është gjermane
Pra
Vjen nga një rracë kriminelësh.
Dhe ne, të dy kriminelët
Rrijmë e luajmë me njëritjetrin”
Ndërsa Profesor Ramazani i dhuroi një lule doktoreshës, duke i puthur dorën me nderim, ndërsa Eqeremi u premton të pijmë nje kafe të mirë të gjithë , historiani Aleksandër, pasionat i muzikës, i leximeve të pafund dhe që ishte krejtësisht dakord me mua që kur gërshetohen cështjet e historianëve me politikat aktuale, sidomos kur këmbëngulin të japin tone, krijojnë probleme, më pyeti:
“Riza, e cdo të shkruash, the?”
“ Po , ja, që një ekip i ansamblit të Bosnjës, gjak i pastër sërb, na hoqi stresin e tmerrshëm të të gjithve ne shqiptarëve;që na ndihmoi një fëmijë me gjak shqiptari ndërsa derdhte gjak papushim nga dora e tijë njomë dhe që nuk i kishte prindërit…”.
Aleksnadri më pa në sy pa mirësinë e zakonëshme.
“Riza!: Shaka po bën? Po ishte një fëmijë i përgjakur, more”.
Dhe vajti e e puthi në faqe birin e shtrejtë të Hajredinit tonë që me zi priste në Tiranë ta shihte të nesërmen.
Pa e ditur se c’po ngjiste këta caste.

Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.