Video

Nga Isidor Koti
isidorkoti@hotmail.com
11 mars 2010

TIRANE - Ishte shumë i nxehur dhe gati sa nuk po nxirrte zjarr nga zemërimi. Prej minutash të tëra priste të zbriste ashensori për në katin zero dhe të shkonte në zyrën e tij. Çdo ditë e njëjta histori. Ishte bërë e padurueshme. Për fat, e shikoja përherë në atë gjendje dhe prisja që një ditë të shpërthente. Ashtu ndodhi. Pikërisht dje, duke e pritur ashensorin bashkë me personazhin e kësaj historie të vërtetë, para tij u shfaq autori i gjithë kësaj çorbe, pronari i ashensorit dhe i gjithë ndërtesës vigane, me xhama të zinj dhe ngjyra përrallore. “I keqtrajtuari” që s’kishte bërë zë, por vetëm priste në heshtje, ishte i huaj dhe i foli anglisht pronarit shqiptar (tek i cili ishte qeramarës), duke u ankuar për vonesën e ashensorit. Unë u përpoqa t’ia përktheja gjithçka, por pronari shqiptar bëri sikur nuk e kuptoi dhe po e dridhte në favor të tij atë bisedë të shkurtër, duke i buzëqeshur qeradhënësit të tij të huaj, dhe pas kësaj iku tinëz. U ngjita bashkë me këtë të mërzitur që po bën biznes në Shqipëri dhe ai po më tregonte se problemi i ashensorit është në sistem, edhe pse ashensori është mjaft i bukur dhe shumë i kushtueshëm. Porsa u bëra gati t’i tregoja që maskarada e veprimeve të atij pronari nuk qëndron vetëm te ashensori, ky i fundit u ndal te kati i të huajit dhe ai u largua për në zyrën e tij gjithë mllef. Më erdhi keq për zemërimin e atij njeriu të mirë, por nëse do t’i tregoja se çfarë ndodh në atë “pallat ëndrrash”, ai kishte për ta kuptuar ku jetojmë ne fatkeqët e viteve 2010, si trajtohemi ne punëtorët hallexhinj dhe të ndershëm shqiptarë nga pronarët tanë ish-pjatalarës, të cilët me pushtetin e lekut dhe të politikës që iu ka fërkuar supet janë ngjitur në majë të Kullës së Babelit dhe tallen me qindra frymë, duke i lënë ato edhe pa bukën e përditshme. Një situatë vërtetë dramatike që vjen jo vetëm nga kriza ekonomike, por edhe nga ajo e identitetit, për të cilën pak flitet, sepse ka një frikë të përgjithëshme. Mijëra shqiptarë sot po vuajnë për bukën e gojës dhe s’kanë ku të ankohen sepse prej muajsh të tërë nuk kanë marrë të ardhurat e tyre mujore. Askush nuk iu jep llogari për këto vonesa. Problemi është i thellë, dinamik dhe provokues. Biznesmenët dhe punëmarrësit po e shfrytëzojnë kategorinë e punëtorëve si skllevër, duke abuzuar me rrogat e tyre, duke u vetëzhytur në borxhe pa fund dhe duke e çuar këtë vend në një kaos që mbart ankth. Askush nuk do të donte ta provonte këtë gjendje, por pyesni me mijëra punonëtorë se në ç’kushte jetojnë sot, sa iu respektohen të drejtat, sa të rrezikuar e kanë jetën nga vështirësitë e skajshme të punës dhe sa të mbrojtur janë nga shteti kur nuk iu përfillen edhe të drejtat më elementare, siç është paga jetike.
Shteti, për t’iu ardhur në ndihmë të gjitha këtyre rasteve ka ngritur disa zyra të veçanta të punësimit, të cilat presin edhe ankesat dhe iu japin orientimet e duhura. Dy nga sugjerimet bazike në lidhje me vonesat e pagave janë largimi nga puna si dhe denoncimi në gjykatë i punëdhënësit. Por edhe po të duan të largohen nga puna e tyre, punëtorët e dinë që askush nuk ka për t’i përfillur. Përkundrazi, do flaken si mbeturinat në koshin e plehërave. Edhe po të kërkojnë të drejtën nëpër gjykata, ata e dinë shumë mirë që procesi do vonohet disa muaj, bosi është më i fortë për ta mbrojtur veten, duke dhënë ca lekë nën dorë dhe ja si zgjidhet kjo histori, ai del i pafajshëm. Këto qindra frymë të keqtrajtuara të viteve 2010, vite të jashtëzakonshme të zhvillimit, pyesin: Jemi njerëz apo skllevër, jemi njerëz apo kafshë që po nëpërkëmbemi nga disa kodosha pa kulturë, pa shkollë, pa dinjitet dhe pa shpirt?! Ka shumë raste të tilla në Tiranë dhe nëpër rrethe, por mungesa e organizimit, ngërçi i krizës, varfëria në masë të madhe tek qytetarët e këtij vendi, i kanë bërë këta të fundit të heshtin dhe të ndrydhin vetveten, duke shpresuar në pritje pa fund.

Është koha që institucionet dhe autoritetet të ndërhyjnë me shpejtësi, duke marrë masa të ashpra ndaj biznesmenëve dhe punëdhënësve, të cilët janë kthyer në rolin e sheikëve dhe skllavopronarëve, duke mos përfillur as njerëzit që marrin në punë dhe as ligjet e shtetit. Fajtore në rastin konkret nuk është vetëm qeveria, por sidomos opozita dhe sindikata që ende nuk po organizojnë protesta masive për të vënë drejtësi në këtyë katrahurë ku abuzohet nga agimi deri në të gdhirë.

Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.