Video

info@hermesnews.org

5 Gusht 2008- Një polic i UNMIK-ut, një i ri shqiptar dhe dy serbë janë lënduar gjatë përleshjeve të dhunshme që shpërthyen mbrëmë në pjesën veriore të Mitrovicës. Përveç të plagosurve, në përleshjet e mbrëmshme, janë dëmtuar edhe 8 vetura dhe tri lokale afariste, pronë e shqiptarëve. Ndërkohë, situata e sigurisë,sipas Policisë së Kosovës, momentalisht është e qetë por vazhdon të jetë e tensionuar. Dy incidente të ndara me karakter ndëretnik kanë ndodhur mbrëmë në Mitrovicë. E tëra filloi pas një rrahjeje në Lagjen e Boshnjakëve në pjesën veriore të qytetit, rreth orës 22, me ç’rast 6 serbë e kanë rrahur me shkopinj druri një 22 vjeçar shqiptar, Bujar Ismailin. Incidenti tjetër i ngjashëm, vazhdoi pas disa orësh në pjesën e quajtur “Tre Rrokaqiejtë”, po ashtu në pjesën veriore të qytetit, pjesë kjo e banuar me shqiptarë e serbë, thotë zëdhënësi i Policisë në Mitrovicë, toger Besim Hoti.

“Pas orëve të para të mesnatës në lagjen e ashtuquajtur “Tre Rrokaqiejtë” në veri të Mitrovicës ku kanë qenë të përfshirë dy grupe shqiptare dhe serbe, e cila është pasuar me demolimin e më tepër se 8 veturave dhe tri lokaleve afariste. Si rezultat i kësaj, një shqiptar është lënduar, 2 serbë dhe një pjesëtar i policisë së UNMIK-ut gjatë intervenimit për qetësimin e situatës. Pas intervenimit, situate është vënë nën kontroll edhe pse mund të nënkuptohet se situate vazhdon të jetë e tensionuar”, tha Hoti. Nga ana tjetër, zëdhënësi i administratës ndërkombëtare në Mitrovicë Georgy Kakuk, nuk dëshiron të komentojë incidentin, por pohon se situata e sigurisë është e qetë. “Unë isha në vendin e ngjarjes dhe krejt çfarë mund t’iu them është se situata e sigurisë tash për tash është qetë”, tha Kakuk. Bëhet e ditur se polici i UNMIK-ut i lënduar mbrëmë është nga India ndërkohë gjendja e tij shëndetësore dhe e të lënduarve të tjerë është jashtë rrezikut për jetë.

Ndryshe, nuk njoftohet për të arrestuar lidhur me incidentin e mbrëmshëm, ndërkohë që policia e Kosovës në bashkëpunim me atë të UNMIK-ut po shqyrtojnë mundësitë për gjetjen e një zgjidhjeje në mënyrë që situatat të tilla në të ardhmen të vihen nën kontroll me kohë. Incidenti i mbrëmshëm, sipas kryetarit të komunës, Bajram Rexhepi, ka qenë i qëllimshëm dhe njëherësh e rrezikon edhe më tej përshkallëzimin e situatës. “Incident i cili mund ta destabilizoj situatën. Ka grupe te caktuara të cilave nuk iu konvenon që situata të jetë e qetë, dhe në kuadër të asaj strategjie ata tentojnë të nxisin reaksion të popullatës shumicë. Pra është incident i qëllimshëm ndëretnik që mund ta rrezikojë edhe më tej eskalimin e situatës”, tha Rexhepi. Rexhepi më tej pohon se qytetarët shqiptarë të Mitrovicës janë maksimalisht të përmbajtur me qëllim që të mos krijohet kurrfarë dhunë ndëretnike. Aktualisht situata e sigurisë në Mitrovicë është e qetë ndërkohë që Policia e Kosovës, ka shtuar dukshëm praninë në pjesën veriore të Mitrovicës.

Dërgo me email |

Stampo artikullin |

Artikulli është lexuar 42 here