Video

info@hermesnews.org

5 Gusht 2008- Kryeministri Hashim Thaçi ia dorëzoi sot ministrit të Forcës së Sigurisë, Fehmi Mujota, vendimin për emërimin e tij në këtë post. Thaçi e përgëzoi ministrin e ri dhe kërkoi nga ai të përmbushë detyrat dhe obligimet që përcaktohen me Kushtetutë dhe me ligjin për Forcën e Sigurisë të Kosovës. Ndërkaq, ministri Mujota tha se shumë shpejt do të konsolidojë të gjitha strukturat e nevojshme të Ministrisë së Forcës së Sigurisë. Fehmi Mujota do të udhëheqë ministrinë e Forcës së Sigurisë së Kosovës. Kryeministri vlerësoi se Fehmi Mujota, me angazhimin e tij të deritashëm ka dëshmuar përkushtimin dhe përgjegjësinë e lartë në avancimin e proceseve politike në Kosovë. “Ky fakt na bënë të besojmë, se emërimi i tij në krye të Ministrisë për Forcën e Sigurisë, do të kontribuojë në suksesin e ndërtimit të strukturave të sigurisë në Kosovë”, ka theksuar kryeministri Thaçi.

Ndërkaq, ministri Mujota shprehu përkushtimin e tij për angazhim dhe përgjegjësi të plotë në pozitën e ministrit për Forcën e Sigurisë. Ministri Mujota tha se do të respektojë dhe do të zbatojë prioritetet e kësaj ministrie siç janë përcaktuar në Kushtetutën e Republikës dhe në Ligjin e FSK-së. Mujota tha se fillimisht do të konsolidojë strukturat e nevojshme të ministrisë. “Do të mundohemi që sa më shpejt që të jetë e mundur të kemi pjesën funksionale të ministrisë. Jam i bindur që këtë do të arrijmë në kohën e duhur dhe do të jemi të gatshëm të marrim detyrat që na takojnë në bazë të Kushtetutës dhe ligjeve që kemi miratuar”. Ndër sfidat e para që mund të përballet kjo ministri është transformimi i TMK-së në FSK. Ky proces tashmë është në zhvillim e sipër. Pjesëtarë të TMK-së, në të gjitha zonat, janë duke aplikuar për anëtarë të Forcës së Sigurisë së Kosovës. Ministri Mujota tha se do të shqyrtohet dhe do të respektohet kontributi i secilit pjesëtar të TMK-së.

“Jemi shumë të vetëdijshëm se ka shumë punë për të bërë dhe natyrisht duhet të ekzistojë një vullnet politik, duhet të ekzistojë një gatishmëri e të gjithë njerëzve përgjegjës për krijimin e FSK-së, duke respektuar edhe duke vlerësuar edhe kontributin e gjithë oficerëve dhe ushtarëve të TMK-së”. Sipas pakos së Ahtisarit Kosova do të ketë 2 mijë e 500 trupa të rregullt të FSK-së dhe 800 pjesëtarë rezervë të saj. Për FSK-në duhet të aplikojnë të gjithë pjesëtarët e TMK-së, pa përjashtim. Ndërsa në rast të mos plotësimit të numrit, të drejtën e aplikimit e kanë edhe qytetarë jashtë TMK-së, prej moshës 18 deri në 21 vjeç. Ata duhet të plotësojnë kriteret e kërkuara të NATO-s, siç është përcaktuar në pakon e Ahtisarit.

Dërgo me email |

Stampo artikullin |

Artikulli është lexuar 44 here