Video

2 Gusht 2008 - Me pavarësinë e Kosovës të shpallur, që do ta bartin si medaljon dhe shenjë krenarie gjatë tërë jetës, duke u dhënë ndjenjën e lumturisë dhe ngazëllimit në vetvete, por pa guximin për ta shprehur publikisht, deputetët e Kuvendit të Republikës së njohur për herë të parë nga shtete të fuqishme botërore, do të pushojnë për një muaj.

Deputetët e Kuvendit të Kosovës janë fatlumë, që miratuan Kushtetutën e Kosovës, dokumenti më i lartë juridik i vendit, por me shumë pyetje që ndoshta nuk do t’ua marrë pushimin, por shumë momente të jetës do t’i duhen t’i kalojnë me sqarimet.

Shumë prej tyre do të mund të arsyetohen se nuk ishin ata, që e miratuan Pakon Ahtisari, dhe se këtë “rrobë”, ia kishte lënë legjislatura pararendëse, por këta ishin që miratuan ligjet, shumë nga të cilat tejkalojnë edhe obligimet e vetë Pakos.

Për shumë gjatë kohë do të debatohet për kufijtë e komunave dhe të pushtetit komunal që do të kenë pakicat serbe, dhe veçanërisht me çështjen e veriut të ngrirë.

Një ‘fantazmë’ që të paktën deputetëve më të ndershëm nuk do t’i lërë shumë qetësi. Shumë gjatë do të vazhdojnë pyetjet për trashëgimin kulturore, dhe për monumentet që iu falen serbëve, veçanërisht i dhimbshëm është kualifikimi i Novobërdës (Artanës), e cila për mijëra vjet furnizoi me arë mbretëritë ilire, edhe vetë Aleksandrin e Madh, principatat shqiptare, Perandorinë romake, dhe pushtuesit turq, dhe ndoshta kurrë apo që nuk ia vlen të përmendet për ata serb, që kurrë nuk e mbajtën aq gjatë sa të kujtohen.

Por, edhe më e dhimbshme do të jetë në kujtesën e tyre vendimi për të nxjerrë një simbol të ri shtetëror, që injoronte atë shqiptar, flamurin dy ngjyrësh, dhe shqiponjën simbolin mbi tre mijë vjeçar shqiptar, me jetëgjatësinë më të madhe në botë, apo për refuzimin e Flamurit të Dardanisë, të propozuar nga Presidenti Rugova, që ende mund të mbetet të paktën flamur presidencial.

Edhe miratimi i një himni pa tekst, që do të intonohet si për njerëz memec, do t’iu kërkojë shumë shpjegime. Ndërkohë, që UNMIK-u thotë se kanë filluar bisedimet e vështira me Serbinë, rikonfigurimi i UNMIK-ut dhe porositë e Ban-it nuk do të lënë të qetë ndërgjegjen e atyre që do të pretendojnë karrierë politike edhe në të ardhmen, nëse mendojnë se sot i kanë kaluar shqetësimet dhe kishin kohën për të pushuar, trazimet do t’iu rikthehen.

Kjo legjislaturë në punën e saj gjashtë mujore është ballafaquar edhe me punë shumë më intensive krahasuar me numrin e seancave të mbajtura nga legjislaturat e mëparshme dhe për numrin e ligjeve të miratuara. Por, kjo çështje duhet t’i bëjë të mendojnë gjatë këtij pushimi, nëse duhet të mbajnë në fuqi rregullin e famshëm me të cilin ia hoqën vetvetes, të drejtën për të diskutuar projektligjet e hartuara sipas kërkesës së Pakos Ahtisari, aq më tepër që tani më ato edhe thuaja kanë përfunduar, por i pret nxjerrja e njërit nga ligjet më famoze për të gjitha vendet ish-komuniste, ligjin për pronën.

Një monitorim statistikor i bërë së fundi nga KDI, e cila në raportin e saj të fundit duket se ka lëvizur para, krahasuar me monitorimet e mëparshme, që vuanin tërësisht nga të dhëna statistikore dhe triviale, evidenton se komisionet parlamentare vazhdojnë të punojnë me ngathtësi, pavarësisht numrit të konsiderueshëm të seancave që kanë mbajtur, 171, 10 nga të cilat ishin dëgjime publike. Komisionet nuk janë treguar efikase në amendamentimin e ligjeve, kanë kryer, por nuk e kanë përfunduar raportin e mbikëçyrjes së Ligjit për Auditimin, ndërsa është në proces monitorimi i licencave për klinikat private. Po ashtu Komisionet parlamentare, por edhe deputetët e kësaj legjislature nuk e kanë iniciuar apo hartuar asnjë projektligj.

Por, mbikëçyrja e përmbushjeve ligjore, përkatësisht e ekzekutivit mbetet sfida kryesore e Kuvendit, dhe është interesant fakti se as opozita nuk ka bërë thuaja asgjë në këtë pikë, duke mbetur tërësisht inerte. Dhe një pjesë e deputetëve, që janë zgjedhur për herë të parë, thuaja ende duket se vazhdon të njihet me detyrat e saj.

Por, e gjithë ajo që ka bërë Kuvendi deri më tani, është e diskutueshme për faktin se deputetët e Kuvendit vazhdojnë të vuajnë nga konformizmi, varësisht nga qëndrimi që kanë ndaj pushtetit apo ndaj grupit, dhe në ngritjen e çështjeve janë kryesisht iniciativa të deputetëve që pretendojnë të krijojnë profilin e tyre apo ta ruajnë atë, ndërsa ka pasur edhe jo pak raste kur deputetët e kanë mbrojtur me sukses fytyrën e përfaqësuesit të zgjedhur. Të lodhur nga “sindromi i pavarësisë”, pas relaksimit mbase do të sjellin freski në punën e tyre, dhe të ndihmojnë në ndryshimin e qeverisjes!

Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email |

Stampo artikullin |

Artikulli është lexuar 61 here