8/1/2008 10:27:10 AM

Asmat Shenwary: 'Më impresionon përkushtimi i shqiptarëve në vendin tim, Afganistan'.

EKSLUZIVE/ Flet flet i riu afgan Asmat Shenwary, punonjës në seksionin e trupave ndërkombëtare në komandën e ISAF-it, Kabul.

Intervistoi: Xheladin Çelmeta

1 Gusht 2008 - “Skuadrat shqiptare, së bashku me trupat e tjera ndërkombëtare po bëjnë një punë të mrekullueshme këtu në Afganistan. Ato po shërojnë plagë lufte, po ndihmojnë njerëz të varfër dhe po kontribuojnë për stabilizimin e gjendjes. Këtë gjë e bëjnë jo vetëm në një ditë, jo vetëm në një javë, por gjatë gjithë kohës sa janë me mision. Njëzetëkatër orë “non stop”, energjitë e tyre mendore e fizike janë në funksion të mbarëvajtjes së misionit. Unë do të shërbeja pranë këtyre njerëzve deri në fund të jetës time, sepse ky është një angazhim për jetën, është një besë e përkushtim për demokracinë e re në vendin tim të bukur, Afganistan”. Kështu shprehet në një intervistë të realizuar përmes linjës së “e-mail”-it në internet, për gazetën “Ndryshe” dhe Hermesnews, i riu afgan në Kabul, Asmat Shenëary, punonjës i seksionit të trupave ndërkombëtare në komandën e ISAF-it.

Asmat, mban edhe një emër të dytë, Masud, sipas traditës afgane. Thotë se veçanërisht përkushtimi i shqiptarëve në misionin e paqes në Afganistan e emocionon mjaft. Sipas tij, aktualisht shqiptarët, bashkë me trupat ndërkombëtare; ato amerikane, dhe të NATO-s po kontribuojnë në zonat më të vështira të Afganistanit, si në Herat, ashtu dhe në Kabul e zona të tjera. Jo vetëm kaq, por dhe spektri i detyrave që ata kryejnë në vendin tim, në emër të paqes, është mjaft i larmishëm. Ja përgjigjet e plota të pyetjeve që i drejtuam atij.

Zoti Asmat, para se të nisim këtë intervistë ju lutem na thoni diçka për veten tuaj; moshën, shkollimin, kualifikimet, etj.?

-Emri im është Asmat Shenwary, ndërkohë kam edhe emër të dytë, Masud. Për kureshtje, në vendin tim, në mjaft zona të Afganistanit, njerëzit për hir të një zakoni të lashtë mbajnë nga dy emra. Jam 21 vjec dhe kam mbaruar shkollën e mesme, si dhe kam shumë kualifikime. Kjo, falë mundësive që krijoi klima e re demokratike pas ardhjes së trupave ndërkombëtare, rrëzimit të regjimit të vjetër dhe ndryshimit të sistemit. Kështu që unë, si jo shumë afganë të tjerë, munda të punoj e të kuafilikohem në kurse të ndryshme trajnuese. Dua të shtoj se ndjehem me fat, pasi këtë gjë do ta dëshironte një pjesë jo e vogël e rinisë në Aganistan.

Ç’përbërje familjare keni, ç’profesion, si dhe në ç’qendër pune po angazhoheni aktualisht?

-Jemi një familje, jo aq e vogël, por njëkohësisht, jo dhe aq e madhe. Pra, për nga numri, mund të thuhet se hyjmë tek familjet mesatare. Ndërsa tradicionalisht, familjet afgane përbëhen nga shumë anëtarë. Kam tre vëllezër dhe dy motra. Babai im është oficer policie dhe mamaja është drejtoreshë në një shkollë afgane.Vëllai i madh, Ismaili, gjithashtu punon për komandën e ISAF-it në Kabul. Ndërsa unë punoj në seksionin e trupave ndërkombëtare.

Domethënë, një familje e tërë në shërbim të paqes dhe stabilitetit të Afganistanit, bashkë me ndërkombëtarët?

-Në një farë mënyre, po. Dhe ndjehem krenar për këtë. Bashkë me shqiptarët e këtushëm, me trupat amerikane, me ato të vendeve të tjera të NATO-s, po vemë të gjitha energjitë që vendi ynë i mrekullueshëm, Afganistani, të stabilizohet e zhvillohet sa më shpejt që të jetë e mundur.

Po, cili është konkretisht misioni juaj pranë Komandës së trupave ndërkombëtare të ISAF-it në Kabul, si dhe veçanërisht në spitalin e Kaijas?

-Misioni im në Kabul ka të bëjë me angazhimin në shërbime të ndryshme; logjistike, teknike, në fushën e përkthimit, të asistencës për detyra koordinuese, në komandën e trupave ndërkombëtare të ISAF-t. Po ashtu, edhe në spitalin e Kaijas unë jam pjesë dhe bashkëpunëtor i skuadrës shëndetësore ndërkombëtare.

Ç’përjetime mund të na përcillni në këtë intervistë tuajën të largët, për trupat që vijnë nga Shqipëria dhe nga më shumë se dyzet vende të Botës për të ndihmuar popullatën afgane me shërbim shëndetësor e më gjerë?

-Po të komentonim gjatë rreth këtij fakti, nuk do të mjaftonin as qindra faqe gazete. Përshtypjet e mia në këtë aspekt janë të jashtëzakonshme. Shkurt, dua të them se këto trupa ndërkombëtare që shërbejnë në vendin tim Afganistan; shqiptarë, amerikanë, çekë, italianë, turq, maqedonë, kroatë, etj, etj, ndodhen këtu pikërisht për të ndihmuar njerëz të varfër afganë. Pra, nëqoftëse ata kanë misionin për të ndihmuar njerëzit, me krenari do të thoja se do t’u shërbeja këtyre njerëzve deri në fund të jetës. Këtë e them pa asnjë mëdyshje. Sikurse mund ta dini, trupa ndërkombëtare paqeruajtëse ka në të gjithë afganistanin, si në qytete ashtu edhe në zona rurale.

Më falni që po ngulmoj të zgjatemi pak në këtë pyetje: Ju personalisht, që prej disa kohësh keni bashkëpunuar me ekipin shëndetësor shqiptar të rotacionit të 5-të e të 6-të, të vendeve të nismës “Adriatik-3”, pjesë e Njësisë Shumëkombëshe të Europës Juglindore në kuadër të ISAF-it në Afganistan. Cilat janë mbresat tuaja nga ky bashkëpunim?

-Kjo pyetje më ngjall një emocion të veçantë, pasi do të flas për ata njerëz të guximshëm, që kanë ardhur nga mijëra kilometra larg, nga Shqipëria, për të shërbyer këtu në spitalin e Kaijas, në Kabul. Këta “bluza të bardha” janë mjekë e infermierë, janë djem, por edhe vajza, siç ka edhe gra familjare, që ndoshta mund të kenë një barrë me halle në vetë familjet e tyre. Respekt e nderim të veçantë për skuadrat shqiptare të shëndetësisë, të cilat janë larg familjeve dhe vendlindjes, duke shërbyer 24 orë “non stop” në Kabul. Ne afganët, u jemi shumë mirënjohës atyre. Personalisht jam shumë i gatshëm të ndihmoj dhe t’u shërbej këtyre njerëzve që gjithmonë mendojnë për ne. Imagjinojeni, në të gjitha orët e ditës apo të natës, ata janë në mënyrë të pandërprerë në shërbim të të sëmurëve afganë që shtrohen sipas rastit, apo dhe të trupave ushtarake.

Si një qytetar afgan, si e vlerësoni kontributin kontributin e përgjithshëm të Forcave të Armatosura shqiptare, të cilat, së bashku me ato të ShBA e NATO-s, po angazhohen për rimëkëmbjen e Ushtrisë së re demokratike të Afganistanit?

-Do të shprehesha thjeshtë: Bashkëpunimi i FA Shqiptare së bashku me forcat e NATO-s dhe ato Amerikane është shumë i rëndësishëm për themelimin e një ushtrie të fortë e demokratike Afgane, sepse pa një të tillë një shtet nuk mund të qëndrojë dot në këmbë. Pikërisht kjo gjë po realizohet tani në Afganistanin e ri. Mendimi im, si qytetar i këtij vendi është se gjërat po shkojnë shumë mirë. Kemi besim të plotë se në këtë rrugë do të vazhdojë të ecë populli afgan, duke patur pranë ndihmën e ndërkombëtarëve, e cila sikurse thashë, është mëse e domosdoshme, më se jetike për këtë vend.

Nëse mund të na e thoni, ç’vend zenë rubrikat për trupat ushtarake shqiptare në gazetën tuaj më të madhe në vend “Afghanistan Times”?

-E përditshmja “Afghanistan Time” ka rubrika mbi trupat e ISAF dhe NATO dhe shqiptarët janë pjesë e këtyre organizmave. Kam dëgjuar se së shpejti Shqipëria do të bëhet anëtare me të drejta të plota në NATO. Ky fakt flet shumë. Tregon se ushtria e vendit tuaj dhe gjithë vendi juaj ka ecur shumë përpara në sistemin e ri demokratik. Këtë gjë do të uroja edhe për vendin tim, Afghanistanin.

Në fund, ndonjë koment shtesë që do të dëshironit të bënit në mbyllje të kësaj bisede për publikun shqiptar, i cili me shumë kënaqësi pret të lexojë intervistën tuaj?

-Më emocionon jashtëzakonisht kjo pyetje. Mbase për këtë do t’i referohesha historisë së vjetër e asaj të re. Komenti im për publikun shqiptar është ky: Ju që nga e kaluara e deri tani keni bërë shumë gjëra për afganët dhe ne presim shumë, sepse shqiptarët janë njerëz shumë mikpritës, të respektueshëm dhe të sjellshëm, prandaj ju sugjerojmë të mos e harroni Afganistanin dhe të bashkëpunoni me ne përgjithmonë.

CV-ja e të riut afgan në ISAF
Kush është Asmat Shenwary?

Djaloshi simpatik afgan Asmat Shenwary (me emër të dytë Masud) është nga Kabuli. Është 21 vjeç dhe ka synime për të ardhen e tij, si çdo i ri afgan sot ne vendin ku po ndërtohet me shumë mundim e sistemi i ri demokratik. Ka mbaruar shkollën e mesme në vendlindje dhe më pas ka mbaruar një varg kualifikimesh për të shërbyer pranë trupave ndërkombnëtare të ISAF-it. Me një anglishte të shkëlqyer, ai komunikon lirshmë me ushtarakët ndërkombëtarë që shërbejnë në ISAF. Vjen nga një familje intelektuale, pasi babain e ka oficer policie dhe kurse mamanë, drejtoreshë në një shkollë afgane.Vëllai i madh, Ismaili, gjithashtu punon për komandën e ISAF-it në Kabul. Ndërsa vetë Asmat, punon në seksionin e trupave ndërkombëtare. Ka tre vëllezër dhe dy motra. Ka simpati të veçantë për punën e madhe që po bëjnë trupat ndërkombëtare në Afghanistan, e në veçanti i bën përshtypje përkushtimi i trupave shqiptare atje.

I riu afgan, Asmat: “Dua të them se këto trupa ndërkombëtare që shërbejnë në vendin tim Afganistan; shqiptarë, amerikanë, çekë, italianë, turq, maqedonë, kroatë, etj, etj, ndodhen këtu pikërisht për të ndihmuar njerëz të varfër afganë. Pra, nëqoftëse ata kanë misionin për të ndihmuar njerëzit, me krenari do të thoja se do t’u shërbeja atyre deri në fund të jetës”.

“Komenti im për publikun shqiptar: Ju që nga e kaluara e deri tani keni bërë shumë gjëra për afganët dhe ne presim shumë, sepse shqiptarët janë njerëz shumë mikpritës, të respektueshëm dhe të sjellshëm, prandaj ju sugjerojmë të mos e harroni Afganistanin dhe të bashkëpunoni me ne përgjithmonë”

Rrëfime të tri femrave të para shqiptare në misione paqeruajtëse
Përvoja në Afganistan, e pazëvendësueshme

Shefkije Demaliaj: “Kam marrë pjesë në misionin e parë pranë ekipit shëndetësor të “A-3”-shit në spitalin ndërkombëtar të Kaijas, në Kabul. Ishte viti 2005 dhe si mjeke kryesoja ekipin shqiptar të inkuadruar në njësinë e përbashkët mjeksore me mision në Afganistan. Kanë kaluar gati tre vjet që nga ajo kohë dhe mbresat e mia janë të pashlyera. Ishte një eksperiencë e rrallë, së cilës i referohem gjithnjë, sa herë që më duhet të përballem me situata të vështira shëndetësore. Janë gjithashtu një vlerë e veçantë qoftë edhe ajo korespodencë që krijohet me kolegë nga vende të ndryshme të Botës, në rrethana të vështira të misioneve paqeruajtëse".

Adile Çelmeta: “Momentalisht jemi në javët e fundit të misionit tonë shëndetësor në kuadër të “A-3”-shit, këtu në komandën e trupave ndërkom bëtare pranë ISAF-it, në Kabul. Spitali i madh ndërkombëtar, ndodhet disa dhjetra kilometra larg nesh, në Bangram. Ndërsa ne shërbejmë në një tjetër spital, në atë të Kaijas, Kabul. Si nfermjere, kemi detyrat tona, të cilat i kryejmë në grup, së bashku me kolegët e vendeve të “A-3”-shit, kroatët e maqedonët. Këtu krijuam një metodologji të re të punës në grup. Edhe alternimi i përvojave, them se pati rëndësi. Një tjetëtr moment i rëndësishëm, ka qenë stërvitja në bordin e helikpoterëve të NATO-s në aeroportin e Kabulit. "

Arta Çekiçi: “Do ta quaja një përvojë të pazëvendëueshme atë që fituam këtu në spitalin e Kabulit në Afganistan. Nëse në fillim e patëm paksa të vështirë të ambientoheshim me mjedisin e ri, me kushtet e klimës, me “ritualin” e ri të punës mes shumë trupave të tjera ndërkombëtare, tani mund të them se ndjehemi tërësisht të përshtatura. Kuptohet, malli për familjet është pjesë e vështirësisë së misionit, por jemi krenarë që ne ishim tri femrat e para shqiptare që shërbyem në një mision të vështirë paqeje larg Shqipërisë, në Afganistan. Ndërkohë ndjehemi krenarë që dhamë një kontribut sado modest, në emër të jetës së popullatës afgane, e cila po ndërton demokracinë e re”.

Misioni

Kyç i suksesit, bashkëpunimi me organet vendore afgane
Sipas informacioneve të publikuar në të përditshmet shqiptare, një nga faktorët që po siguron suksesin e duhur në misionin e paqes në Afganistan është bashkëpunimi me organet e qeverisjes vendore. Trupat shqiptare në Herat, gjithsej 113 ushtarakë, si dhe ato në Kasul, gjithsej 22 ushtarakë, po kryejnë me sukses të plotë detyrat në kuadër të ISAF-it, duke koordinuar punët me këto organe vendore afgane. Ndërkohë, ekipi mjeksor shqiptar i “A-3”-shit, në spitalin e Kaijas, Kabul, ndodhet në muajin e fundit të detryrës atje. Edhe këtu, bashkëpunimi me organet vendore, sikurse mësohet edhe nga gazeta “Afghanistan Times”, ka rëndësinë e vet. Komanda e ISAF-it, pak ditë më parë ka dekoruar 4 pjestarët e ekipit shqiptar me “Medaljen e misionit të paqes”. Po ashtu, çertifikata vlerësimi për ekipin shqiptar në Kaija, Kabul, ka dhënë edhe komande e trupave italiane, si palë bashkëpunuese në mision.



Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 123 here