7/31/2008 4:27:33 PM

Qeveria miratoi propozimin për ndërtimin e 18 hidrocentraleve të vogla

Qeveria e Kosovës po vazhdon angazhimin dhe përkushtimin e saj për integrim në Bashkimin Evropian dhe në NATO

info@hermesnews.org

31 Korrik 2008- Qeveria e Kosovës po vazhdon angazhimin dhe përkushtimin e saj për integrim në Bashkimin Evropian dhe në NATO. Kështu tha kryeministri Hashim Thaçi, në mbledhjen e sotme të qeverisë, duke folur rreth planit të veprimit të Partneritetit Evropian 2008 dhe strukturave për integrim evropian. Qeveria po vazhdon të punojë me përkushtim rreth realizimit të planit për integrime evropiane. Gjatë shqyrtimit të planit të veprimit të Partneritetit Evropian 2008 dhe strukturave për integrim evropian, kryeministri Hashim Thaçi tha se qeveria duhet të vazhdojë të punojë edhe më tutje sipas standardeve perëndimore, që janë në përputhje të plotë me BE-në.

Ministri i Shërbimeve Publike, Arsim Bajrami, kërkoi që të bëhet nivelimi i pagave shtesë të ekspertëve, të cilët, megjithëse kanë pozita të njëjta, pagat shtesë i kanë të ndryshme, gjë që i shtyn ata të lëvizin nga njëra ministri në tjetrën, apo edhe në biznesin privat. Ai paraqiti të dhënat për administratën tatimore, shërbimin doganor, qendrën e prodhimit të dokumenteve dhe departamentin e teknologjisë informative. Ministrja e drejtësisë Nekibe Kelmendi kërkoi që nivelimi të bëhet edhe në gjykata, kurse ministri i Administrimit të Pushtetit Lokal, Fadil Ferati, tha se një gjë e tillë është e nevojshme edhe për administratat komunale. Ndërkohë, qeveria miratoi sot edhe strategjinë dhe planin e veprimit për luftë kundër trafikimit me qenie njerëzore 2008-2011, realizimi i së cilës do të kushtojë rreth 50 mijë euro.Ministri i Punëve të Brendshme, Zenun Pajaziti, tha se gjendja në këtë sferë është tejet shqetësuese, pasi Kosova ende mbetet si vend i origjinës, transitit dhe destinacionit për qeniet e trafikuara.

Qeveria miratoi edhe propozimin e ministres së Energjetikës dhe Minierave, Justina Pula, për ndërtimin e 18 hidrocentraleve të vogla, të cilat mund të ndërtohen me investime private. Qeveria,njëkohësisht, miratoi edhe udhëzimin administrativ me afat gjashtëmujor për procedura të shkyçjes dhe ri-kyçjes së konsumatorëve të energjisë elektrike. Ministrja Pula tha se kjo do të bëhet në kuadër të përpjekjeve të qeverisë që vendi të dalë nga kriza energjetike.Në mbledhjen e sotme u shqyrtuan edhe çështja e ankandit publik si dhe ajo për lokacionin e Institutit të Historisë.

Dërgo me email | Stampo artikullin | Artikulli është lexuar 61 here