7/30/2008 9:10:22 AM

Intervistë me Darling Vlorën/ ' Tapite e pronave te familjes Vlora u zhduken nga Sigurimi i Shtetit'

EKSLUZIVE/ 'Sjelljen jo korrekte dhe aspak perëndimore të Rektorit me prof.Nedim Vlorën e mësova nëpërmjet shtypit të këtyre ditëve dhe, të them të drejtën, më indinjoi. Nuk dua kurrë ta besoj që një Rektor, kushdoqoftë, për një konflikt personal, të shkojë me ndërgjegje të plotë, deri në këtë pikë.'

Doriana Metollari
drejtor@hermesnews.org

30 Korrik 2008 - Si e kanë përjetuar situatën e ditëve të fundit pasardhësit e një prej figurave kryesore, Ismail Qemalit?

Të turpshëm... Të qëllimshëm... Antikombëtar... Absurd...
Unë jam larguar nga Shqipëria, më 1998, dhe që nga ajo kohë jetoj në Itali, por, megjithatë, nëpërmjet shtypit online kam ndjekur gjithmonë lajmet nga vendi ynë. Propozimin e Rektorit, të miratuar me maxhorancë nga Senati, mbi heqjen e emrit të Ismail Qemalit nga Universiteti i Vlorës, e lexova më 28 korrik dhe, të them të drejtën, nuk u besoja syve... Si shqiptar është e rëndë por, si pasardhës i Ismail Qemalit dhe si vlonjat, ky vendim ishte vërtet ofendues për mua dhe familjen time. Gjatë diktaturës ne, që jetuam në Shqipëri, jemi përndjekur politikisht, në të gjitha format, që nga burgimet e deri në mbylljet e dyerve të shkollave, punërave nga më të rëndat, etj.etj. Ajo ishte një periudhë e zezë për Shqipërinë. Por, në qoftëse në atë periudhë mund të prisje çdo gjë, sot, në demokraci, veprime të tilla të turpshme dhe antikombëtare, që fyejnë rëndë Simbolet e Kombit, të cilat na bëjnë të ndjehemi krenarë, duhet të ndëshkohen.

A mendoni se ka patur influenca politike ky vendim?

Nuk jam në gjëndje për të dhënë një opinion në këtë drejtim por, shpresoj me gjithë zemër, që kjo "marrëzi" të jetë thjesht një ide personale e Rektorit dhe tetshes që e ka mbështetur, pa asnjë lloj baze dhe influence politike.

Nje motiv duhet ta kete...?

Motivin e vërtetë sigurisht që e di vetëm Rektori dhe Klani i tij. Argumentet që ai shtron se gjoja Ismail Qemali "S'ka qenë përfaqësues i arsimit dhe shkencës" dhe, për këtë arsye emri i tij nuk na qenka i denjë për të përfaqësuar Universitetin e Vlorës, sigurisht që nuk kanë asnjë bazë. Në radhë të parë, Rektori dhe Klani, të lexojnë Historinë e Rilindjes Shqiptare që, siç duket, nuk e njohin aspak ose, më keq akoma, e denigrojnë atë. Megjithatë përgjigjen e duhur, për këtë gjë, e kanë dhënë vetë shqiptarët, me shprehjen e indinjatës së tyre ndaj këtij veprimi të turpshëm. Sot, në Gazetën Shqiptare (29 korrik) përfaqësues me emër të botës akademike, të cilët sigurisht Veprën e Ismail Qemalit e njohin shumë më mirë se Rektori, kanë renditur një sërë përpjekjesh dhe arritjesh të Ismail Qemalit, që e bëjnë të denjë të quhet "përfaqësues i arsimit dhe shkencës". Po ashtu mendimi i Rexhep Qoses i cili, thellësisht i indinjuar për këtë "çmenduri morale dhe historike" i cilëson "Kujtimet" e Ismail Qemalit, këtij "arsimdashësi të madh", "më të rëndësishmet historike në letërsinë shqipe". Një tjetër argument që Rektori paraqet është se heqja e emrit e bënë "shumë herë më të marketueshëm Universitetin". Nuk arrij ta kuptoj se ku qëndron pengesa e emrit "Ismail Qemal" në prezantimin e Universitetit në Botë kur, vetë Rektori, Tanush Shaska, ka një emër dhe mbiemër nga më të vështirët për t'u shqiptuar nga të huajt, gjë që duhet ta ketë provuar në kurriz të tij vetë Rektori, gjatë qëndrimit në Amerikë. Po sikur të huajt, për efekt "marketingu", të na kërkojnë të ndryshojmë emrin e bukur SHQIPERI, çfarë do të na këshillonte Rektori? Unë shpresoj dhe uroj që ky vendim antikombëtar, jo vetëm mos aprovohet nga organet kopetente, por të shkohet më tej, për të gjetur shkaqet e vërteta të "këtij marketingu"!!!
Të mos aprovosh një emër, sado të nderuar, për të përfaqësuar një institucion, mund ta quaj edhe normale. Por, të heqësh një emër, në rastin tonë Simbolin e Pavarësisë, ky veprim ka vetëm një emër: TURP.
Unë mendoj që, nëse ky vendim anullohet (dhe duhet të jetë kështu), përderisa në krye të Universitetit të Vlorës të qëndroj ai Rektor dhe Klani i tij, ai Universitet nuk është i denjë të mbajë emrin e nderuar të Ismail Qemalit.

Ky vendim erdhi i papritur per ju?

Ishte një lajm krejtësisht i papritur dhe shumë... shumë... befasues. Më pas, duke lexuar shumë komente online, mësova se "de facto" Rektori prej kohësh e kishte bërë këtë ndryshim dhe, këtë shkelje kaq të rëndë, priste ta ligjëronte. Kushdo mund ta shikonte, deri dje, se në faqen online të Universitetit emri i Ismail Qemalit ishte fshirë, por sot, pas "shpërthimit të këtij skandali" çuditërisht kjo faqe nuk hapet më.

Egziston ndonje inat i vjeter me familjen Vlora

Fatkeqësisht dhe fatmirësisht njëherësh, pjesa më e madhe e familjes Vlora (brezi im), momentalisht jeton jashtë Shqipërisë, pra jashtë jetës sociale dhe politike të vendit. Prandaj pikën e përplasjes, në këtë rast, nuk arrij ta shikoj.

A mund të jetë vendimi si rrjedhojë e ndonjë konflikti ndërmjet prof.Nedim Vlorës dhe Rektorit?

Sjelljen jo korrekte dhe aspak perëndimore të Rektorit me prof.Nedim Vlorën e mësova nëpërmjet shtypit të këtyre ditëve dhe, të them të drejtën, më indinjoi. Nuk dua kurrë ta besoj që një Rektor, kushdoqoftë, për një konflikt personal, të shkojë me ndërgjegje të plotë, deri në këtë pikë.

Familja Vlora, që ndodhet në Shqipëri, sa ka qenë në dijeni të jetës politike të Ismail Qemalit?

Fëmijët e Ismail Qemalit u vendosën në Shqipëri pas vdekjes së të atit, më 1919. Djemtë kanë qenë bashkëpunëtorët më të ngushtë të tij, gjë që vërtetohet në shumë dokumenta të kohës, por Historia jonë nuk u ka dhënë akoma vendin e merituar. Unë uroj që, në kuadrin e rishkrimit të Historisë, hedhur me të drejtë kohët e fundit, historianët tanë, duke lënë mënjanë influencat politike, të shkruajnë një histori të pastër dhe, nëse ndodh vërtet kështu, familja Vlora padyshim do zejë një vend të rëndësishëm e të nderuar.

Cila është e vërteta e pronave të familjes Vlora?

Kjo pyetje, në vetvete, është një histori e tërë. Familja Vlora, prej shumë shekujsh, ka qenë një nga familjet më të pasura të Shqipërisë. Ky fakt, përveç që njihet fare mirë në Shqipëri, është i konfirmuar edhe nga kronistë dhe historianë të shquar të Europës. Familja Vlora kishte në pronësi Kështjellën e Kaninës dhe Teqenë, ndërtuar më 1501 nga Sinan Pashai, në oborrin e së cilës ishin varret e Familjes Vlora dhe Tyrbja e Sinan Pashait. Poshtë në qytet, përveç pronave të shumta, kishin në pronësi "Sarajet e Vlorajve" (me një oborr prej rreth 40.000 m2), ku u Shpall Pavarësia dhe ku sot gjendet Sheshi i Flamurit. Të gjitha këto prona, ose më mirë ato që familja dispononte deri më 1944, u shtetëzuan. Ismail Qemali, personalisht, kishte mjaft prona në Turqi. Gjatë periudhës komuniste u krijua, në Tiranë, "Shoqëria Komisionere" e cila u mblodhi tapitë shqiptarëve që kishin prona jashtë, gjoja për të ndërmjetësuar kthimin e tyre. Trashëgimtarët e Ismail Qemalit, që jetonin në Shqipëri, dorëzuan 55 kopje tapi të cilat, më pas, u zhdukën nga Sigurimi i Shtetit, i cili fshihej mbas "Shoqërisë Komisionere".

A është e vërtetë se një pjesë e pronave të familjes Vlora janë shitur ilegalisht?

Për pronat që ka familja jonë, kryesisht në Vlorë e Kaninë, ne, fatkeqësisht nuk disponojmë asnjë dokument ndaj, në një situatë të tillë, kur shteti, në vend që të ndihmojë, të pengon, mund të ketë edhe abuzime. Megjithatë, personalisht, nuk di gjë, lidhur me këtë fakt.

Çfarë do prisje nga faqet e shtypit të këtyre ditëve?

Sigurisht ajo që do doja të lexoja sa më parë që të ishte e mundur, do ishte anullimi i këtij vendimi dhe marrja e masave karshi personave që ngritën gjithë këtë pluhur, sepse vetëm kështu mendoj se çdo gjë ndoshta do rikthehej në vendin e vet. Por, mbi të gjitha, shpresoj që mos kemë surpriza të tjera...



Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 219 here