Video

Albert Zholi

30 Korrik 2008 - A është bërë ndonjë projekt për jetimet deri në ditët e sotme nga Ministria e Punës, Çështjeve Sociale dhe Shanseve të Barabarta?

Për të saktësuar edhe më mirë kontekstin e pyetjes tuaj, unë do t’ju përgjigjesha me një kundërpyetje:
Në “malin” e projekteve të shumta që janë hartuar nga ky dikaster për vite me radhë edhe për jetimët, a kanë përfituar nga këto projekte dhe shërbime vërtet klientët e tyre që janë vetë fëmijët jetimë?
Mendoj se kjo pyetje nuk ka vend për koment, sepse përgjigja mund të nënkuptohet lehtësisht nga panorama sociale dhe realiteti migjenian në të cilën ndodhen sot jetimët në mbarë vendin.
Të vjen keq kur konstaton se në 18 vjetët e këtij tranzicioni të zgjatur pa motiv dhe me shumë dhimbje, komuniteti i jetimëve rezulton të jetë pjesa me e penalizuar dhe më e stigmatizuar nga institucionet përgjegjëse që merren me politikat reabilituese dhe integruese të kësaj kategorie.
Përgjegjëse për këtë, pa asnjë mëdyshje, është institucioni qëndror që përgjigjet drejtëpërsëdrejti për fëmijët jetimë; Ministria e Punës, Çështjeve Sociale dhe Shanseve të Barabarta dhe Drejtoria e Përgjithshme e Shërbimit Social Shtetëror.
Këtyre dy institucioneve që për nga emri që mbajnë, (do t’i kishin zili edhe institucionet më prestigjioze ndërkombëtare me tradita dhe përvoja më të mira në këtë fushë), nuk u ka mbetur gjë tjetër, veçse ky emër linear e pompoz që u shërben si një cuperturë për të mbuluar njollën e turpit social të një administrate të fryrë e burokrate, tërësisht e paaftë për të menaxhuar politikat sociale të shtetit tonë.

Ç’farë Politikash sociale janë zhvilluar deri më sot për jetimët?

U shpreha qartë në fillim të kësaj interviste.
Gjithçka është folur në drejtim të këtyre politikave, nuk ka qenë asgjë tjetër, veçse një “fabrikim” i demagogjisë së turpëshme sociale me tryeza pafund seminaresh e simpoziumesh mediatike, dhe një “mal” me para nga buxheti i shtetit, para të dhëna veçanërisht nga donatorët e huaj dhe Banka Botërore, të cilat janë harxhuar në emër të jetimëve dhe të shtresave të tjera në nevojë, por jo të përfituara nga këta të fundit.
Këto para, mjerisht janë grabitur dhe vazhdojnë të grabiten nga grykësit e kollarisur, zyrtarë të lartë shtetërorë që kanë patur dhe kanë në dorë implementimin e këtyre programeve dhe projekteve.
Këto projekte, tradicionalisht filtrohen me një precizion të lartë, janë administruar dhe administrohen nga “mjeshtërit” e përvetësimit të këtyre parave që janë brenda institucioneve shtetërore përgjegjëse, siç është MPÇSSHB dhe Drejtoria e Përgjithshme e Shërbimit Social Shtetëror.
Është një skemë tepër e sofistikuar korruptive, shumë solide, që funksionon në mënyrë perfekte brenda institucioneve shtetërore në bashkëpunim me operatorët privatë, (OJF-të) anonime aspak transparente, të cilat kinse, flasin dhe përfaqësohen në emër të grupeve të interesit.
Për ironi të fatit, këto OJF janë të inkorporuara brenda zyrave të administratës së Drejtorisë së Përgjithshme të Shërbimit Social Shtetëror.
Ky është rasti më flagrant që vjen në kundërshtim të plotë me ligjin mbi funksionimin e administratës shtetërore; që përbën një konflikt të hapur dhe të pastër të interesit mes operatorëve shtetëror dhe atyre joqeveritarë.
Mund të them me plot bindje, se fusha më e ndjeshme në mbështetjen e donacioneve nga institucione ndërkombëtare, veçanërisht nga Banka Botërore, ka qenë ajo e fëmijëve në nevojë, veçanërisht për fëmijët jetimë. Janë qindra - milona Euro që donatorë të huaj nuk kanë hezituar për t’i financuar në këto programe për këtë kategori. Por, fatkeqësia e këtyre donacioneve ka qenë se këto para kanë shkuar në duar të gabuara.
Pra, në duar të abuzuesve permanent të këtij tranzicioni absurd.

Keni patur mbështetje nga Ministria e Punës, Çështjeve Sociale dhe Shanseve të barabarta?

Asnjëherë nuk kam preferuar të pranoj ndihmën e atyre njerëzve që, për interesa meskine e përfitime personale të paligjshme në kurriz të jetimëve, kanë dhunuar në mënyrë sistematike ligjet dhe politikën sociale të shtetit.
Nuk kam pranuar dhe nuk do të pranoj asnjë ndihmë nga ata që kanë shkeluar dhe përdhosin kodin tradicional të solidaritetit njerëzor, atë kod që kemi trashëguar nga e kaluara dhe nga paraardhësit tanë; humanizmin.
Jo! Kjo është shumë e rëndësishme për t’u ndarë njëherë e përgjithmonë nga ato fenomene të rënda abuzive që e kanë prezantuar dhe certifikuar këtë vend përballë ndërkombëtarëve me njollën e zezë të turpit dhe krimit social.
Në asnjë rast nuk do të pranoja ndihmë nga ata që padrejtësisht flasin në emër të shtetit, por që në praktikë kanë viktimizuar pambarimisht këtë kategori sociale të pambrojtur, të cilët, duke përfituar nga statusi i pafavorshëm social i jetimëve, kanë mundur të ngrejnë “ngrehinën” e tyre sociale të luksit dhe të mirëqënies së pamerituar.
I përkas kësaj kategorie që ka vuajtur në të kaluarën dhe vuan më shumë se askush tjetër në shoqërinë tonë. Nëse do të veproja ndryshe, do të më dukej vetja i zhveshur nga çdo lloj norme dhe morali njerëzor. Kjo gjë nuk do të më falej. Sigurisht, kur ndihma është e sinqertë, ajo është e dobishme dhe shumë e rëndësishme për të përmirësuar dhe garantuar të ardhmen e këtyre fëmijëve. Shpresoj se koha do t’i vendos gjërat në vendin e duhur.

A mendoni se po abuzohet me fondet e jetimëve?

E kam deklaruar edhe herë të tjera publikisht se, nëse fondet e destinuara në mbështetje të programeve në ndihmë të jetimëve do të përdoreshin me transparencë dhe në dobi të tyre, nuk do të kishim sot këtë realitet vrastar dhe përjashtues të kësaj kategorie.
Janë gjithsej 32.000 fëmijë jetimë që presin dhe shpresojnë të kenë pranë dorën e ngrohtë të shtetit. Këta fëmijë, i shikon sot rrugëve duke lypur dhe shitur cigare për të nxjerrë bukën e gojës dhe për të mbijetuar.
Janë fëmijë jetimë të braktisur nga komuniteti, pushteti lokal dhe ai komunar në të gjitha zonat e Shqipërisë. Mjafton të sjellim si shembull 4 fëmijët jetimë të Baldushkut, që u kthyhen për të gjithë shqiptar në simbol të dhimbjes. Ata, që prej 2 vjetësh jetonin të braktisur nga komuniteti në mjerim të thellë, në luftë me mbijetesën.
Raste të tilla i gjen sot në shumë zona varfëra të Shqipërisë. Janë fëmijë të rrezikuar nga krimi dhe prostitucioni, trafikimi dhe droga. Janë fëmijë që nuk jetojnë fëmijërinë si të gjithë bashkëmoshatarët e tyre normalë. Kjo është e patolerueshme në shekullin në të cilin jetojmë sot.
Që nga viti 1990 e deri tani, donacionet që kanë ofruar donatorët e huaj dhe paratë që ka akorduar qeveria shqiptare për programet në ndihmë të njerëzve në nevojë dhe të fëmijëve jetimë, kapin vlerën 15 miliard USD.
Sot, Shqipëria do të krahasohej pa frikë me modelet e vëndeve më të socializuara dhe me traditë në këtë drejtim, siç janë vendet skandinave, Suedia, Norvegjia, Danimarka, Hollanda, etj. Por, mjerisht realiteti tregon të kundërtën. Mendoj se nevojitet një vullnet i plotë politik nga të gjitha krahët e politikës, për të hartuar programe të rëndësishme reabilituese, integruese dhe zhvillimi, shumë të qarta për këtë kategori.
Ndryshe, institucionet ndërkombëtare që i kemi shumë qejf për t’i përmendur si kartë politike për arritjet që kemi bërë, do të vazhdojnë të tregohen skeptike dhe shumë të ashpër me ne. Ato do të vazhdojnë të na vlerësojnë si një vend që nuk respektojmë të drejtat dhe liritë më themelore dhe jetike të njeriut, siç është e drejta për një jetë të dinjitetshme, veçanërisht ndaj atyre njerëzve që janë në nevojë, përfshirë këtu edhe jetimët. Kjo është shumë e rëndësishme për të gjithë ata që merren me politikë dhe kanë në dorë të ndryshojnë realitetin e kësaj kategorie që kanë më shumë nevojë se askush tjetër.

Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email |

Stampo artikullin |

Artikulli është lexuar 71 here